بسمِ اللهِ الرّحمنِ الرّحيم
السّلامُ عليكم ورحمةُ اللهِ وبركاتهُ
زى ما العنوان بيقول التقل صنعة
ومشكلة البنات دلوقتى ان هما مش بيعرفوا يتقلوا بمعنى اخر ان هما لما بيشدوا الحبل بيشدوا مرة واحد او بيرخوا الحبل وده طبعا مينفعش
الزمن اللى احنا فيه مينفعش ان خطيبى او خطيبك يحسوا ان احنا مدلوقين عليهم او مش قادرين نعيش من غيرهم
هما بيحب البنت اللى وثقة من نفسها ومش طول النهار زن وبتحب النكد زى عينها وطبعا زى ما كلنا عارفين ان ده طبعنا كلام فى سركم
يعنى معظم مشاكل البنات فى القسم ده ان خطيبها مش بيكلمها خطيبها مش مهتم بيها خطيبها مع صحابه خطيبها مش بيكلمها غير 10دقايق خطيبها بيقعد على النت كتير ومش بيكلمنى
بصى انا اول واحدة عندى مشاكل كتير بس الحمد الله على كل شئ ربنا يجيبه عشان اكيد ربنا بيختبرنا والخطوبة دى زى الاختبار يا تنجح فيه وتتروحى غش الزوجية قصدى عش الزوجية ياما لا قدر الله ميحصلش نصيب وساعتها بيكون الصدمة فى البنت
تقعد تعيط وتتعب وهما مش دماغهم واكيد كلكم معاية فى الراى
ده عشان كده احنا عايزين نتقل عليهم عشان يعرفوا قيمتنا يعنى انا حاقولكم على شوية طرق نتقل بيها وكل واحدة طبعا تدخل وتقول طرق نتقل بيها بس مع العلم ان الطرق اللى تنفع مع خطيبى مش حتنفع مع خطيبك يعنى كل واحدة تجرب مع خطيبها اللى حيجيب نتيجة معاها مش اللى حيتقلب ضدها اللهم بلغت اللهم فاشهد
1- لو متعودة ترن كتير يعنى لو فى اليوم 3مرات مثلا مترنيش غير مرة واحدة رد رد مردش خالص هو لما يعوز يكلمك حيتكلم
2- لو خارج مع صحابه متفتحيش الاسطوانة المشروخة بتاعتنا بتاعت لا متخرجش متروحش لا انا اولى ان انا اخرج معاك الراجل مش بيحب التقيد قوليله اخرج واتفسح وفك عن نفسك
3- لو فى شغله مترنيش كتير او تكلميه كتير عشان ميضيقش منك
4- حاولى ميكنش هو الوحيد فى حياتك بمعنى انك تشغلى نفسك بحاجة
روقى البيت مع مامتك اعملى الاكل اقعدى على النت اتفرجى على التليفزيون ولو فى الشغل يبقى تروحى شغلك وتيجى تشغلى نفسك
5- انا اللى بقوله يعنى مش قصدى ان احنا مبنكلمهومش بس يعنى نخف عليهم شوية يعنى ترنى مرة واحدة مش تقعدى تزنى طول النهار
6- ولو خطيبك من النوع العصبى حاولى لما يكون متعصب متكلموش غير لما يهدى وبعد كده تتكلمى معاه براحة
7- لو خطيبك من النوع اللى بيقلب الترابيزة عليكى يعنى يكون غلطان ويقلبك انتى اللى غلطانة لو انتى شايفة انه غلطان انتى براحة وبهدوء وفهميه وجهة نظرك
واعرفى اللى بيتنازل عن حقه مرة بيتنازل كتير ومبيعملش كرامة لنفسه من الاول يبقى محدش حيعملك احترام ولا يقدرك
ولو هو غلطان فى حقك يبقى هو اللى يصلحك ولو انتى غلطانة صالحيه الاعتراف بالغلط ده الصح اما انك تكونى غلطانة وتقولى لا انا مش غلطانة ده اكبر غلط
8- مش نقعد ونحط ايدينا على خدينا ونمسك الموبايل ونقوله رن زى ماهو مشغول لازم انتى تحسسيه انك برضه مشغول
9- لو بيحب انك تعملى حاجة معينة اعمليها تشغلى نفسك بيها يعنى لو بيحب انك تتعملى الطبخ اتعلمى اهى حاجة تشغلك وهو حيفرح انك عملتيها
10- ولو انتى من النوع الغيورة اللى بتغير على خطيبها ياريت الغيرة تكون فى المعقول عشان الغيرة لما بتزيد عن حدها بتقلب للشك ومنقلش برضه الغيرة متقلبش لبرود وعدم اهتمام وهما بيفكروها عدم حب
حصريا علي منتديات الامام
دمتم في سعادة وخير ولاتنسونا من صالح الدعاء
تقبل الله منا و منكم سائر الأعمال و جعلها خالصة لوجهه الكريم أمين يا رب العالمين
اخوكم اسلام خلف امام الوحيلي
